Kalaallit Nunaata Kitaani 2000-imi sinerissamut qanittumi raajarniarnermi ilassutitut pisassiissutit pillugit Namminersornerullutik Oqartussat nalunaarutaat nr. 14, 14. juni 2000-imeersoq.
Aalisarneq pillugu Inatsisartut inatsisaanni nr. 18-imi, 31. oktober 1996-imeersumi, kingullermik inatsisartut inatsisaatigut nr. 6, 20. maj 1998-imeersukkut allanngortinneqartumi, § 10, § 14, imm. 1, imm. 2 aamma imm. 3, § 33, imm. 2 aamma § 34, imm. 3, naapertorlugit aalaja-ngersarneqarpoq:
Nalunaarutip atuuffii siunertaalu
§ 1. Nalunaarut inuussutissarsiutigalugu raajarniarnermut imartani Kalaallit Nunaata aalisarnikkut oqartussaaffigisaani, inunnit ingerlatseqatigiiffinnilluunniit aalisarneq pillugu inatsisartut inatsisaanni § 6 naapertorlugu kalaallit angallataannik, angallatip usitussutsimut uuttuutaa malillugu 75 BRT/120 BT-init mikinerusunik, ingerlanneqartumut atuuppoq.
Imm. 2. Taamatuttaaq nalunaarut angallatinut radiukkut attaveqartilluni ima ilisarnaatilinnut atuuppoq: OZJO, OUHK, OUUC, OZTZ, OULB, OVXD, OWES, OYKA, OVOJ, OWMZ aamma OZTJ.
Imm. 3. Nalunaarummi pineqarput angallatit qulaani taaneqartut, 1. januar 2000-imi aamma nalunaarutip atuutilerfiani inuussutissarsiutigalugu raajarniarnermut akuersissummik peqartut.§ 2. Nalunaarutikkut siunertarineqarpoq Kalaallit Nunaata Kitaani sinerissamut qanittumi raajarniarnermi pisassiissutit tamarmiusut siunertamut naleqquttumik uumassusillillu eqqarsaatigalugit illersorneqarsinnaasumik sapinngisamik pitsaasumik iluaqutigineqarnissaasa qularnaarneqarnissaat.
Ilassutitut pisassiissutinik qinnuteqartarneq
§ 3. Kalaallit Nunaata Kitaani 2000-imi sinerissap qanittuani raajarniarnermi ilassutitut pisassiissutinik qinnuteqaat Inuussutissarsiornermut Pisortaqarfimmut nassiunneqassaaq.
Imm. 2. Qinnuteqaat angallatip piffissami qinnuteqarfiusumi pisassaminit pisarisimasai pillugit uppernarsaatinik ilaqartinneqassaaq. Tunisat allagartaasa imaluunniit tunisat allagartaasa kingulliit assilineqarneri, akuersissummik pigisaqartup qinnuteqarnermi pisassaminit pisarisimasaanik takutitsisut, uppernarsaatitut atorneqassapput.§ 4. Kalaallit Nunaata Kitaani 2000-imi sinerissamut qanittumi raajarniarnermut ilassutitut pisassiissutinik qinnuteqaatit Inuussutissarsiornermut Naalakkersuisumit aalajangiivigineqartassapput.
Imm. 2. Qinnuteqaatit kingusinnerpaamik qaammammi ulloq kingulleq tiguneqartut kingusinnerpaamik qaammammi tullermi ulloq 15-iat aalajangiivigineqartassapput. Qinnuteqaatit kingusinnerpaamik qaammatip ulluisa 15-ianni tiguneqartut kingusinnerpaamik qaammatip taassuma ulluisa kingullersaanni aalajangiivigineqartassapput.Ilassutitut pisassiissutinik
agguaassinissanut tunngavissat§ 5. Kalaallit Nunaata Kitaani sinerissamut qanittumi raajarniarnermi pisarineqarsinnaasut tamarmiusut qaangerneqarnissaat ilimagineqarsinnaappat ilassutaasunik pisassiisoqarsinnaanngilaq.
§ 6. Angallatit akuersissutaat tunisassiornissamut akuersissutitaqanngitsut ukiumut pisassamik minnerpaamik 80%-iinik pisaqareersimasut 2000-imut ilassutitut pisassinneqarsinnaapput.
§ 7. Angallatit 2000-imut ukiumut pisassiissutit taakkuluunniit ilaanik allanut atugassanngortitsisimasut ilassutitut pisassinneqarsinnaanngillat.
Imm. 2. Uppernarsarneqarsinnaappat pisassiissutinik allanut atugassanngortitsineq pissutsinik immikkut ittunik pissuteqartoq, soorlu assersuutigalugu angallatip amutsivimmiissimaneranik allanilluunniit pissuteqartumik piffissami sivisunerusumi atorneqarsinnaasimannginneranik taamaattumillu pissutissaqavilluni nammineq ukiumut pisassiissutinik tamakkiisinnaasimanngitsutut isumaqarfigisariaqarluni, taava angallat ilassutitut pisassiissuteqarfigineqarsinnaavoq.§ 8. Ilassutitut pisassiissutit 25, 50 imaluunniit 100 tonsinngorlugit tunniunneqartassapput.
Imm. 2. Immikkut pissutissaqarpat naalakkersuisunut ilaasortaq ilassutitut pisassiissutinik allatut annertussusilinnik tunniussisinnaavoq.
Imm. 3. Aalisariutip pisaqarsinnaassusia, ukiumut pisassai, ukioq naallugu aalisarsinnaanera qularnaarniarlugu pisassinneqarnissaminik pisariaqartitsinera, kiisalu 2000-imi Kalaallit Nunaata Kitaani sinerissamut qanittumi raajarniarnermi pisassat tamarmiusut sianiginiarneqarnissaat ilassutitut pisassiissutit qanoq annertutiginissaannut aalajangiisuusassapput.§ 9. Angallatip aallaqqaammut ukiumut pisassiissutit tamaasa, kiisalu 2000-imut ilassutitut pisassiissutigineqartut 80%-ii pisarereerpagit, § 3 naapertorlugu ilassutitut pisassiissutinik qinnuteqartoqaqqissinnaavoq.
Allanut atugassanngortitsineq, ukiumut pisassiissutit nalunaarutigineqarnerat
aamma pisassiissutinik ilanngaasarneq§ 10. Ilassutitut pisassiissutinik taakkuluunniit ilaannik allanut atugassanngortitsisoqarsinnaanngilaq.
§ 11. Ilassutitut pisassiinermi 2000-imut ukiumut pisassat pillugit nalunaarummik nutaamik tunniussisoqassaaq.
§ 12. Pisassiissutit ilanngarneqartassapput imatut tulleriinnilimmik:
1) Ilassutitut pisasseereernermi aamma nutaanik ukiumut pisassiissutinik tunniussereernermi aallaqqaammut ukiumut pisassiissutit procentii sinneruttut siulliullugit aalisarneqassapput pisassiissutinit ilanngaatissat ilassutitut pisassiissutinut tutsinneqalinnginnerini.
2) Suli allanik ilassutitut pisasseereernermi aamma nutaanik ukiumut pisassiissutinik tunniussereernermi ilassutitut pisassiissutigineqartut siulliit procentii sinneruttut siulliullugit aalisarneqassapput pisassiissutinit ilanngaatissat ilassutitut pisassiissutinut kingullernut tutsinneqalinnginnerini.Aalisarnermik unitsitsineq
§ 13. Kalaallit Nunaata Kitaani sinerissamut qanittumi raajarniarnermi pisarineqarsinnaasut tamarmiusut qaangerneqartussanngorunarpata angallatit ilassutitut pisassinneqarsimasut aamma ilassutitut pisassiissutinik aalisartut aalisarnermik unitsitsinissaat naalakkersuisunut ilaasortap nalunaarutigissavaa.
Imm. 2. Aalisarnerup unitsinneqarnissaanut piffissaliussaq tusagassiorfitsigut nalunaarutigineqarsinnaavoq.§ 14. Angallatit ilassutitut pisassinneqarsimasut aamma ilassutitut pisassiissutinik aalisartut kingusinnerpaamik piffissami naalakkersuisunut ilaasortap nalunaarutigisaani aalisarneq unitsissavaat.
Pineqaatissiinerit
§ 15. § 14–imik unioqqutitsinerit akiliisitaanermik kinguneqarsinnaapput.
Imm. 2. § 14-imik unioqqutitsinerit aalisarnermi atortunik atorneqarsimasunik, aalisariutip pisaanik tamanik taakkuluunniit nalinginik, taamaattorli pinnagit pisat angallatip nammineq ukiumut pisassaanit ilassutitulluunniit pisassaanit ilanngaatigineqartussatut uppernarsarneqarsinnaasut pisallu aalisarnerup uniffissaata siornatigut pisarineqarsimasutut uppernarsarneqarsinnaasut, arsaarinninnermik kinguneqarsinnaapput.
Imm. 3. Tamakkuttaaq pillugit suliassat aalisarneq pillugu inatsimmi malittarisassat malillugit suliarineqartassapput.Atuutilerfia
§ 16. Nalunaarut ulloq 15. juni 2000-imi atuutilerpoq. Nalunaarut 1. januar 2001 atorunnaassaaq.
Namminersornerullutik Oqartussat, ulloq 14. juni 2000.
Simon Olsen
/
Amalie Jessen